‘Un popul che a no’l colte il sô teatri al è muribont se no pardabon zà muart.’
Federico Garcia Lorca.
Mi visi di vê cjatât cheste citazion, jò fantat o pôc di plui, stampade sul programut di sale di un spetacul par furlan da la companìe d’in chê volte dal Piccolo Teatro Città di Udine direte di Rodolfo Castiglione… Al podeve sei ‘Strissant vie pe gnot’ di Luigi Candoni, o ‘I Purcinei’ di Titute Lalele, o ‘Gnè Milie’ di Alviero Negro, ma o dîs cussì, lant a pescjâ a câs in te storie dal teatri furlan… ma chê citazion a fo par me sflandorôse. A tignive dentri la peraule ‘teatri’… a tignive dentri la peraule ‘popul’. Afidave venastai in cualchi maniere la responsabilitât de colture dal teatri (e pui in gjenerâl da l’art), la sô tutele, la so difêse in maniere drete al popul, a lis personis, a la assemblèe, a la comunitât.
D’in che volte la definizion di ‘teatri popolâr di art’, che dispes o ài cjatât tal gno vagolâ pai teatris, e à vût un significât besclet par me. Chel di un teatri che a nas dentri di une comunitât vivarôse, che e partecipe a di un rituâl che al covente, une comunitât ch’a si dâ dongje, a cjape dentri, a met adun, a si cjale in muse, e a sielç tant che lûc pal cjatâsi e pal confrontâsi un puest vêr, reâl, il teatri, no facebook, no i social. In reson di chel, mai come in dì di vué e jé une vore clare la cussience che il teatri al incjarne un pinsîr e une pratiche fondamentâls pal divignì de nestre civiltât. Il teatri al è il puest dal cjatâsi des esperiencis, individuâls e sociâls. E ducj chei che a son tirâs dentri e àn di fai cuintri a la tindince di conformâ la plui naturâl des ativitâts umanis, il comunicâ, a di un sôl model, chel dal podê mediatic. Ducj: artiscj, critics, organizadôrs, tecnics, public.
Il teatri al à di fâ ‘whatever it takes’ par riafermâ la sô capacitât di jessi lûc sociâl par ecelence, un lûc cussì antîc da jessi difat à l’avanvuardie: avanvuardie sociâl e no dome estetiche.
La tradizion teatrâl alore in dì di vué e à di jessi intindude tant che trampulin d’indulà cjapâ il svuâl par cjalâ lontan, e par contâi dal îr e dal vué a la comunitât interie dal Friûl di vué e di doman. Eco cà alore la tierce peraule de citazion di Garcia Lorca: la peraule ‘coltâ’. E eco alore il parcé da la fondazion di un Teatri Stabil Furlan, sepe plantade vué, da la cuâl a vegni fûr une plante vivarôse, resistent, eterne.
Massimo Somaglino – Discors di scrèe dal Teatri Stabil Furlan –
Teatro Nuovo Giovanni da Udine – 29.5.2021
