La sauride stagjon dal Teatri Stabil Furlan
‘Savôrs’ e je la peraule ’dal gustâ’ che chest’an o vin sielgiût par dai il titul a la gnove stagjon 2026 dal Teatri Stabil Furlan. E di ‘gustâ’ si cjacare, difat, presentant une stagjon che a mostre parsore di une stesse taule tancj savôrs diferents, preparâts di tancj artiscj furlans di divignincis diviersis de nestre regjon, tacant de montagne pordenonêse (chê de pitine, par capîsi) di Marta Riservato che nus conte la storie straordinarie di sô none Argie, passant par chê citât che a sarà capitâl taliane de culture 2027 di Lisa Moras, cuntune storie che a sa di orient e di ocident, lant indenant viars soreli jevât cul lavôr centrât sul mangjâ furlan dal libri di recipis de contesse Perusini di Bettina Carniato, une polse tal Cuei par un bon taj cul lavôr sul vin di Carlo Onado, scritôr di zai milanês prestât al Friûl, e vie ancjemò simpri lant viars il cricâ dì cun la conte di un pâr di smursiei blancs e ros pierdûs intune storie là che par mangjâ a dile dute si mangjave ben pôc, de bande de gurizane Elisa Menon, e ancjemò plui in là cul incuintri sul confin, fra salamp e cevapcici di Aida Talliente e Patrizia Jurincic Finzgar. Rivant ancje a fâ un scjampon tas Gjermaniis là che i Krauten a deventin bruade par contâ une altre storie dal secul passât de bande di Maria Milisavljevic (tantis feminis chest’an), cul jutori preziôs di Federico Scarpin e un grant salt (chel sì, ‘oceanic’) di chê atre bande dal mont cul incuintri speciâl fra ramen e ‘suf, fra Yukio Mishima e Pier Paolo Pasolini siervît in taule di Marco Maria Tosolini. Ce sorte di viaç dentri de mangjative, nomo? E dut chest intun ambient gnûf dal dut, la gnove sede dal TSF, che a si cjate dentri de fiere di Torrean di Martignà. Une taule gnove gnove tant che un altri savôr di zontâ àl gustâ. ‘Gustâ’, propit.
Vegnîso a cene cun nô?
Teatri Furlan: il stât da la art
1 Luglio 2023 11:00 - 27 Agosto 2023 11:00
Dal 1 di Lui al 26 di Avost ogni sabide aes 11.00 al larà in onde su Radio Onde Furlane un intervent de Cunvigne!
Inte suaze de 46te edizion de Fieste di Patrie dal Friûl, il Teatri Stabil Furlan e la Associazion Teatrâl Furlane a àn decidût di organizâ, pai 15 di Avrîl, te sale Civiche di Place Vittoria a Caprive, une cunvigne sui stâts gjenerâi dal teatri furlan: “Teatri furlan: il stât da la art”.
Relatôrs (in ordin alfabetic)
- Anna Pia Bernardis, atore – President Associazione Teatrale Friulana
- Gianluca Franco, autôr e delegât Societât Filologjiche Furlane “Graziadio Isaia Ascoli”
- Anna Gubiani, dramaturg – Associazione Matearium
- Rita Maffei, atore e regjiste – Presidente CSS Teatro Stabile d’innovazione del FVG
- Claudio Moretti, atôr, autôr e regjist – Fondatôr dal Teatro Incerto
- Gianni Nistri, atôr – President de Fondazione Teatro Nuovo Giovanni da Udine
- Paolo Patui, dramaturc – storic dal teatri
- Massimo Somaglino, atôr, regjist – Diretôr Artistic Teatri Stabil Furlan
Al modere: Alessio Screm
Associazion Teatrâl Furlane
Fondade intal 1987 par iniziative di apassionâts di Teatri Furlan, la Associazion Teatrâl Furlane (A.T.F.) e je un organisim culturâl ricognossût di interès regjonâl, colegât cu la associazion FITA/UILT (che e da adun lis compagniis amatoriâls talianis) e e pues contâ cumò su 51 compagniis amatoriâls iscritis che a vegnin des provinciis di Udin, Pordenon e Gurize. E contribuìs a organizâ pai siei associâts, in colaborazion cui Comuns e cun chês altris realtâts culturâls locâls, rassegnis di teatri amatoriâl pal plui in lenghe furlane, ma ancje intes diviersis fevelis regjonâls dialetâls e in lenghe taliane.
Teatri Stabil Furlan
Fondât intal 2019 daûr iniziative dal Comun di Udin, il Teatri Stabil Furlan al è une Associazion Culturâl ricognossude de Regjon Friûl-Vignesie Julie, che e à tant che socis fondadôrs il Comun di Udin, la ARLeF – Agjenzie Regjonâl pe lenghe furlane, la Societât Filologjiche Furlane, la Fondazion Teatri Gnûf “Giovanni da Udine”, il CSS Teatri Stabil di Inovazion dal Friûl-Vignesie Julie, la academie civiche di Art Dramatiche Nico Pepe, l’Istitût Ladin Furlan Pre Checo Placerean, e tant che fin statutari la ativitât di produzion e circuitazion di spetacui teatrâi professionâi che a valorizin la lenghe e la culture furlanis doprant la lenghe furlane o di altris minorancis linguistichis, e che a vedin carateristichis di professionalitât in dutis lis lôr componentis artistichis, tecnichis e organizativis.
Sintonizeiti su FM 90.00 MHz Udin e 90.20 MHz Cjargne o scolte la direte sul sît Radio Onde Furlane
