La sauride stagjon dal Teatri Stabil Furlan
‘Savôrs’ e je la peraule ’dal gustâ’ che chest’an o vin sielgiût par dai il titul a la gnove stagjon 2026 dal Teatri Stabil Furlan. E di ‘gustâ’ si cjacare, difat, presentant une stagjon che a mostre parsore di une stesse taule tancj savôrs diferents, preparâts di tancj artiscj furlans di divignincis diviersis de nestre regjon, tacant de montagne pordenonêse (chê de pitine, par capîsi) di Marta Riservato che nus conte la storie straordinarie di sô none Argie, passant par chê citât che a sarà capitâl taliane de culture 2027 di Lisa Moras, cuntune storie che a sa di orient e di ocident, lant indenant viars soreli jevât cul lavôr centrât sul mangjâ furlan dal libri di recipis de contesse Perusini di Bettina Carniato, une polse tal Cuei par un bon taj cul lavôr sul vin di Carlo Onado, scritôr di zai milanês prestât al Friûl, e vie ancjemò simpri lant viars il cricâ dì cun la conte di un pâr di smursiei blancs e ros pierdûs intune storie là che par mangjâ a dile dute si mangjave ben pôc, de bande de gurizane Elisa Menon, e ancjemò plui in là cul incuintri sul confin, fra salamp e cevapcici di Aida Talliente e Patrizia Jurincic Finzgar. Rivant ancje a fâ un scjampon tas Gjermaniis là che i Krauten a deventin bruade par contâ une altre storie dal secul passât de bande di Maria Milisavljevic (tantis feminis chest’an), cul jutori preziôs di Federico Scarpin e un grant salt (chel sì, ‘oceanic’) di chê atre bande dal mont cul incuintri speciâl fra ramen e ‘suf, fra Yukio Mishima e Pier Paolo Pasolini siervît in taule di Marco Maria Tosolini. Ce sorte di viaç dentri de mangjative, nomo? E dut chest intun ambient gnûf dal dut, la gnove sede dal TSF, che a si cjate dentri de fiere di Torrean di Martignà. Une taule gnove gnove tant che un altri savôr di zontâ àl gustâ. ‘Gustâ’, propit.
Vegnîso a cene cun nô?
IN ETERNI IL NESTRI ÎR
31/01/26 18:00
di Maria Milisavljevic
Traduzion par furlan di Federico Scarpin
Leture seniche di Massimo Somaglino
Musiche dal vîf di Alessio Zoratto
Tecnic dal sun Carlo Gris
Produzion TEATRI STABIL FURLAN
Chest drame, voltât par furlan dal origjinâl todesc, al è une opare corâl, ma di un côr di fantasimis, chês stessis che a jemplin la nestre tiere e i nestris concets di ‘identitât’: tropis a ‘nt sono in Friûl, sedi se lis cirìn tal paisaç, sedi in maniere metaforiche, di cjasis che a delimitin i confins? E il stes Friûl, no isal stât (e no isal ancjemò) une cjase cuntune puarte, mo vierte mo sierade, par dâ acet o par slontanâ, par partî, tornâ, mandâ vie un ‘Altri’ che al rivave, e che al ven ancjemò, dal ‘mont che al bruse’? E no ise la puarte stesse a fâju, chei doi spazis diferents, dulà che prime a ‘nd jere un sôl?
Questo dramma, tradotto in friulano dall’originale tedesco, è un’opera corale, ma di un coro di fantasmi, quegli stessi che riempiono la nostra terra e i nostri concetti di ‘identità’: quante ce ne sono in Friuli, sia a cercarle nel paesaggio, sia in una maniera del tutto metaforica, di case che delimitano i confini? E lo stesso Friuli, non è forse stato (e non è ancora) una casa con una porta, talvolta aperta altre chiusa, per accogliere o respingere, per partire, tornare, scacciare un ‘Altro’ che arrivava, e che arriva ancora, dal ‘mondo che brucia’? E non è la porta stessa a segnare quei due spazi differenti laddove prima ce n’era uno solo?
Maria Milisavljević a vinçût il premi Kleist par zovins dramaturcs tal 2013 e tal 2017 cun il drame Beben e à vinçût l’Heidelberger Stückemarkt Autorenpreis e l’Else Lasker-Schüler Stückpreis. Li sôs oparis a son stadis voltadis par inglês, spagnûl, francês, portughês, olandês, serp, bulgar, gjaponês, corean e cumò par furlan.
