La sauride stagjon dal Teatri Stabil Furlan
‘Savôrs’ e je la peraule ’dal gustâ’ che chest’an o vin sielgiût par dai il titul a la gnove stagjon 2026 dal Teatri Stabil Furlan. E di ‘gustâ’ si cjacare, difat, presentant une stagjon che a mostre parsore di une stesse taule tancj savôrs diferents, preparâts di tancj artiscj furlans di divignincis diviersis de nestre regjon, tacant de montagne pordenonêse (chê de pitine, par capîsi) di Marta Riservato che nus conte la storie straordinarie di sô none Argie, passant par chê citât che a sarà capitâl taliane de culture 2027 di Lisa Moras, cuntune storie che a sa di orient e di ocident, lant indenant viars soreli jevât cul lavôr centrât sul mangjâ furlan dal libri di recipis de contesse Perusini di Bettina Carniato, une polse tal Cuei par un bon taj cul lavôr sul vin di Carlo Onado, scritôr di zai milanês prestât al Friûl, e vie ancjemò simpri lant viars il cricâ dì cun la conte di un pâr di smursiei blancs e ros pierdûs intune storie là che par mangjâ a dile dute si mangjave ben pôc, de bande de gurizane Elisa Menon, e ancjemò plui in là cul incuintri sul confin, fra salamp e cevapcici di Aida Talliente e Patrizia Jurincic Finzgar. Rivant ancje a fâ un scjampon tas Gjermaniis là che i Krauten a deventin bruade par contâ une altre storie dal secul passât de bande di Maria Milisavljevic (tantis feminis chest’an), cul jutori preziôs di Federico Scarpin e un grant salt (chel sì, ‘oceanic’) di chê atre bande dal mont cul incuintri speciâl fra ramen e ‘suf, fra Yukio Mishima e Pier Paolo Pasolini siervît in taule di Marco Maria Tosolini. Ce sorte di viaç dentri de mangjative, nomo? E dut chest intun ambient gnûf dal dut, la gnove sede dal TSF, che a si cjate dentri de fiere di Torrean di Martignà. Une taule gnove gnove tant che un altri savôr di zontâ àl gustâ. ‘Gustâ’, propit.
Vegnîso a cene cun nô?
MISHIMA / PASOLINI – DIALOGO A MORTE
24/06/26 20:30
Dramaturgjie Marco Maria Tosolini
Regjie Sonia Dorigo e Marco Maria Tosolini
Coordenament artistic Sonia Dorigo
Ricercje iconografiche: Federico Màzzolo
Videoart e Videocomposizions: Davide Marzona
Ilustrazions: Emanuele Barison
Sound recording & editing: Vittorio Vella
Yukio Mishima – Shunsuke Senda
Pier Paolo Pasolini – Giacomo Vit
La Pizia – Paola Bacchetti
Haiku musicâi in prime assolude Giordano De Nisi Alessandro Meacci
Violin Giada Visentin
Trombe Ottaviano Cristofoli
Coro femminile dell’Università di Tokyo
Consulence linguistiche pe lenghe gjaponese Flavio Parisi
Consulence linguistiche pe lenghe furlane ARLeF
Consulence linguistiche pe lenghe grêc antîc Anna Rosa Termini
Consulence arts marziâls Ichiban Budo Dojo
Produzion Teatri Stabil Furlan, ARLeF, Fondazione Luigi Bon
Tal 2025 a son stâts celebrâts il centesim inovâl de nassite dal scritôr gjaponês e il cincuantesim inovâl de muart dal poete furlan. Il dialic jenfri lis dôs “fantasimis sonoris” al nas, duncje, intai monts di là di ognidun dai doi autôrs e si disvilupe traviers di cjapitui curts, cun tal mieç musichis par violin e par côr e vilotis furlanis, lant daûr de struture de Ars Oratoria e di moments rituâi che a son peâts cun jê. Il dialic, cun framieç diviers intervents musicâi, al viôt une sorte di duel concetuâl/fonetic/etic/lessicâl jenfri i doi grancj autôrs, dulà che dispès lis parts si ribaltin, a vegnin rimarcadis similitudins e diversitâts, vicinancis e distancis. Ducj i doi a ciraran di rinunziâ al ego provant a lâ jù a fonts in ce che al esist e in ce che nol esist, plui di ce che a son stâts bogns di fâ in vite. Narcisisim, eros, violence, falsificazion incussiente (e no), ricercje di purece, definizion di valôrs, tradizion e dissoluzion de civiltât, a saran un pôcs dai argoments che i doi a frontaran dulà che Satori gjaponês e tragjedie ocidentâl a interagjiran in mûts une vore diferents cuntun finâl sospindût, o forsit no.
Nel 2025 sono stati celebrati il 100° anno della nascita dello scrittore giapponese e il 50° anno della morte del poeta friulano. Il dialogo nasce, dunque, nei “rispettivi” al di là. Inframezzato da musiche per violino e per coro e villotte friulane, il dialogo fra i due “Fantasmi sonori” si sviluppa attraverso brevi capitoli seguendo la struttura dell’Ars Oratoria e momenti rituali che ad essa si collegano. Il dialogo, frammentato da interventi musicali, vede una sorta di duello concettuale/fonetico/etico/lessicale fra i due grandi autori, dove non di rado le parti si rovesciano, vengono rilevate similitudini e diversità, vicinanze e distanze. Entrambi cercheranno di rinunciare all’ego tentando di andare in maggior profondità dell’esistente e dell’inesistente più di quanto non siano riusciti a fare in vita. Narcisismo, eros, violenza, falsificazione inconsapevole (e non), ricerca di purezza, definizione di valori, tradizione e dissoluzione della civiltà, saranno alcuni degli argomenti che i due affronteranno dove Satori giapponese e tragedia occidentale interagiranno in entrambi in modi assai diversi con un finale sospeso, o forse no.
