La sauride stagjon dal Teatri Stabil Furlan
‘Savôrs’ e je la peraule ’dal gustâ’ che chest’an o vin sielgiût par dai il titul a la gnove stagjon 2026 dal Teatri Stabil Furlan. E di ‘gustâ’ si cjacare, difat, presentant une stagjon che a mostre parsore di une stesse taule tancj savôrs diferents, preparâts di tancj artiscj furlans di divignincis diviersis de nestre regjon, tacant de montagne pordenonêse (chê de pitine, par capîsi) di Marta Riservato che nus conte la storie straordinarie di sô none Argie, passant par chê citât che a sarà capitâl taliane de culture 2027 di Lisa Moras, cuntune storie che a sa di orient e di ocident, lant indenant viars soreli jevât cul lavôr centrât sul mangjâ furlan dal libri di recipis de contesse Perusini di Bettina Carniato, une polse tal Cuei par un bon taj cul lavôr sul vin di Carlo Onado, scritôr di zai milanês prestât al Friûl, e vie ancjemò simpri lant viars il cricâ dì cun la conte di un pâr di smursiei blancs e ros pierdûs intune storie là che par mangjâ a dile dute si mangjave ben pôc, de bande de gurizane Elisa Menon, e ancjemò plui in là cul incuintri sul confin, fra salamp e cevapcici di Aida Talliente e Patrizia Jurincic Finzgar. Rivant ancje a fâ un scjampon tas Gjermaniis là che i Krauten a deventin bruade par contâ une altre storie dal secul passât de bande di Maria Milisavljevic (tantis feminis chest’an), cul jutori preziôs di Federico Scarpin e un grant salt (chel sì, ‘oceanic’) di chê atre bande dal mont cul incuintri speciâl fra ramen e ‘suf, fra Yukio Mishima e Pier Paolo Pasolini siervît in taule di Marco Maria Tosolini. Ce sorte di viaç dentri de mangjative, nomo? E dut chest intun ambient gnûf dal dut, la gnove sede dal TSF, che a si cjate dentri de fiere di Torrean di Martignà. Une taule gnove gnove tant che un altri savôr di zontâ àl gustâ. ‘Gustâ’, propit.
Vegnîso a cene cun nô?
SAPIDI BACI. DI PIETANZE E D’AMORI
13/03/26 20:00
di Bettina Carniato e Fabio Turchini
cun Bettina Carniato, Giuliano Bonanni, Barbara Errico, Giulia Della Peruta, Antonino Puliafito, Romano Todesco
Senografie Andrea e Claudio Mezzelani
Regjie Bettina Carniato
Produzion TEATRI STABIL FURLAN e ARLeF
“Sapidi Baci. Di pietanze e d’amori” al è un spetacul in lenghe taliane cuntune anime furlane tal profont: un viaç jenfri memoriis, savôrs, musiche e sintiments, ispirât ae figure di Giuseppina Perusini Antonini (1874-1975), pioniere dal vin in Friûl Vignesie Julie. In chest spetacul di tancj colôrs, la bussade e devente metafore di magjiche zontadure: dai spirts in cercje, cualchi volte sufierte, de metât che e mancje, par fâ di dôs animis diferentis e incompletis une uniche anime perfete; di savôrs che ur van incuintri a altris savôrs, fin che no componin une pitance di no podê dismenteâ.
‘Sapidi Baci. Di pietanze e d’amori’, è uno spettacolo in lingua italiana dall’anima profondamente friulana: un viaggio tra memorie, sapori, musica e sentimenti, ispirato alla figura di Giuseppina Perusini Antonini (1874-1975), pioniera del vino in Friuli Venezia Giulia. In questo variopinto spettacolo il bacio diventa metafora di magica congiunzione: degli spiriti alla ricerca, talvolta sofferta, della metà mancante, per fare di due anime distinte e incomplete un’unica anima perfetta; di sapori protesi verso altri sapori, sino a comporre l’indimenticabile pietanza.
